მთხოვარი — შიო მღვიმელი
Topics: класика
Beginning
გზის პირას იდგა მთხოვარი,
სად ხალხი მიმოდიოდა,
გამვლელ და გამომვლელთანა
უძლურებაზე ჩიოდა:
- დამიგდო ავადმყოფობამ,
უკურნებელმა ძნელადა,
საქმე გამიხდა სათხოვრად,
კარისკარ დასავლელადა. -
მგზავრს შეებრალა გლახაკი,
აჩვილდა გრძნობა-გულითა;
ადგა, გაიღო წყალობა,
უკანასკნელი ფულითა.
- იქნებ შენ უფრო გიჭირდეს, -
ჰკითხა მთხოვარმა, - ძამია?
ვინ იცის, ნამგზავრს, დაღლილსა
ლუკმაც არ შეგიჭამია!
- აიღე, კიდევ ვიშოვნი,
ქვეყნიერება დიდია,
ჯანსაღი უძლურისთვის
მუდამ კიბე და ხიდია. -
უთხრა და სამუშაოზე
მიმართა იქვე სოფელსა;
გლახა კი გულით მადლობდა
მგზავრსა და მგზავრის მშობელსა.
Tap any word for its translation at once; the word goes into your deck together with its sentence.